ភ្នំពេញ: កម្លាំងសមត្ថកិច្ច នគរបាលស្រុកកៀនស្វាយ កាលពី អាធ្រាត ថ្ងៃទី១៩ ខែតុលា ឆ្នាំ២០២១ បានបង្រ្កាប ក្រុមសង្ស័យសកម្ម ជិះម៉ូតូទាក់ឆ្កែ របស់អ្នកភូមិ នៅពេលយប់ៗ ចំនួន៤នាក់ និង បានឃាត់ខ្លួន ជនសង្ស័យចំនួន៣នាក់, ម្នាក់ទៀត បានរត់គេចគេចខ្លួន ប្រព្រឹត្ត នៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្ដាល។
សមត្ថកិច្ចស្រុកកៀនស្វាយ បានអោយដឹងថា ជនសង្ស័យ៣នាក់ខាងលើ ដែលត្រូវបានឃាត់ខ្លួន រួមមាន៖ ទី ១-ឈ្មោះវ៉េង សិលា ហៅខ្លី ភេទប្រុស អាយុ២៤ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅភូមិកំពង់សំបួរលើ ឃុំព្រែកថ្មី ស្រុកកោះធំ ខេត្តកណ្ដាល, ទី២-ឈ្មោះឡេង វណ្ណារ៉ា ហៅទុង ភេទប្រុសអាយុ២៩ឆ្នាំ ជនជាតិខ្មែរ មុខរបរ កម្មករសំរោង មានទីលំនៅភូមិស្វាយលើ ឃុំព្រែកថ្មី ស្រុកកោះធំ ខេត្តកណ្ដាល, និងទី-៣ ឈ្មោះផន ពេជ្រ ហៅស្រ៊ុន ភេទប្រុសអាយុ២៨ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅភូមិព្រែកតាដួង ឃុំព្រែកថ្មី ស្រុកកោះធំ ខេត្តកណ្ដាល ។
ចំណែកឯ ជនសង្ស័យម្នាក់ទៀត ដែល រត់គេចខ្លួន មានឈ្មោះ យ៉ែម ជីវ័ន្ដ ភេទប្រុស អាយុ២៣ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅភូមិព្រែកតាដួង ឃុំព្រែកថ្មី ស្រុកកោះធំ ខេត្តកណ្ដាល ។
មន្ត្រីសមត្ថកិច្ចបានបញ្ជាក់ថា ចំពោះវត្ថុតាងដែលកម្លាំងសមត្ថកិច្ច ដកហូតរួមមាន៖
- ម៉ូតូមួយគ្រឿងម៉ាកស៊ុយស៊ូគីស្មាស់ពណ៌ខ្មៅបិតស្គត់ពណ៌ខៀវ ស៊េរីឆ្នាំ២០០៩ពាក់ស្លាកលេខកណ្ដាល1H.1590។
- សត្វឆ្កែចំនួនពីរក្បាលសម្បុរខ្មៅមួយក្បាល(ញី) សម្បុរចំប៉ាមួយក្បាល(ឈ្មោល)។
- ទូរស័ព្ទដៃមួយគ្រឿងម៉ាកNOKIAពណ៌ខ្មៅ។
- ទូរស័ព្ទដៃមួយគ្រឿងម៉ាកVfoneមួយគ្រឿងពណ៌ផ្ទៃមេឃ។
- ទូរស័ព្ទដៃមួយគ្រឿងម៉ាក់HUAWEIពណ៌ខៀវ។
- ដងសម្រាប់ទាក់សត្វឆ្កែមួយធ្វើពីឬស្សីប្រវែង១.២០ម៉ែត្រ នឹងខ្សែប្រាំងកង់ប្រវែង១.៦០ម៉ែត្រ នឹងមានរុំកៅស៊ូពោះវៀនកង់ពណ៌ខ្មៅលាយជាមួយក្រណាត់ពណ៌ខ្មៅ។
មន្ត្រីសមត្ថកិច្ចនគរបាលបានបន្ថែមថា នៅពេលសាកសួរ, ជនសង្ស័យទាំង៣នាក់ខាងលើបានឆ្លើយសរភាពថា ពួកគេ ពិតជាបានធើ្វសកម្មភាព លួច(ទាក់សត្វឆ្កែ)ពិតប្រាកដមែន។
បច្ចុប្បន្ននេះ, ពួកគេទាំង៣នាក់ ត្រូវបានបញ្ជូនទៅឃាត់ខ្លួន ជាបណ្ថោះអាសន្ន ស្នងការដ្ឋាននគរបាលខេត្តកណ្តាល ដើម្បីចាត់ការតាមនីតិវិធីច្បាប់៕
ដោយ រស្មី អាកាស
